Agricultura

Universidade Nacional Timor Lorosa’e (UNTL) nia Fakuldade Agrikultura liuhusi Departamentu Saúde Animál hamutuk ho Ministériu Agrikultura no Peskas (MAP) realiza semináriu ho tema “Introdusaun sientífiku kona-ba moras Foot and Mouth Disease (FMD), oinsá polítika governu Timor-Leste hasoru moras FMD”, iha salaun MAP Comoro, Díli (06/10).

Vise-dekanu Asuntu Estudantíl FAGRI nian Profesór Rui de Carvalho agradese ba MAP tanba bele simu estudante no dosente sira hodi realiza seminariu refere atu prevene virus FMD ne’e no fó atensaun ba komunidade.

“Agradese ba MAP tanba bele simu estudante no dosente sira hodi halo semináriu ne’ebé ko’alia kona-ba moras FMD, oinsá atu prevene no fó atensaun ba komunidade hodi tau matan ba moras ne’e, oinsá moras ne’e labele tama ita-nia rai hodi la lori moras FMD ne’e afeta ba animál sira”, dehan Vise-dekanu.

Profesór Alipio de Almeida hanesan oradór husu ba parte relevante sira atu bele tau atensaun hodi halo survilénsia ativu liuliu iha área fronteira hodi prevene entrada FMD.

“Ami husu ba parte relevante atu halo survilénsia ativu liuliu iha área fronteira, bainhira moras ne’e kuandu tama, komunidade ne’ebé hela iha área fronteira sai vítima, tanba ne’e husu parte relevante sira atu tau atensaun”, hatutan Alipio.

Relasiona ho asuntu ne’e, Diretór Jerál Pekuária no Vertenária (MAP) nian, Sr. Domingos Gusmão hateten, Ministériu iha planu feitu atu halo prevensaun no responde ba kualker moras animál nian ne’ebé mosu inklui moras FMD ne’e.

“Agora ita-nia laboratáriu kompletu no ita-nia rekursu espesialista sira mós iha, atu bele deteta moras sira ne’e, tanba ne’e importansaun ita la trava ita halo kontrola másimu de’it, liuhusi koordena ho ministériu relevante sira, liu-liu kuarentina no alfandega atu bele halo survilénsia iha área fronteira terrestre hodi kontrola movimentu animál nian”, nia hateten.

Estudante Moshe Dias Marcal sente kontente bele koñese diak kona-ba moras FMD hodi hato’o ba sosiedade hodi hatene moras FMD ne’ebé sei akontese ba animal sira ne’ebé haki’ak.

“Ha’u sente kontente bele partisipa no hetan informasaun barak kona-ba moras FMD ne’ebe afeta ba animal sira no oinsá bele halo prevensaun, maské moras ne’e sedauk tama iha Timor-Leste”, tenik.

Partisipa husi dosente, funsionáriu sira, no estudante UNTL no estudante husi UNITAL inklui konvidadu sira