Agricultura

Universidade Nacional Timor Lorosa’e (UNTL) nia Fakuldade Agrikultura (FAGRI) realiza semináriu (Worshop Community Development) ho tema “Mengatasi Gangguan Reproduksi dan Technology Inseminasi Buatan dan USG” iha salaun FAGRI Kampus Sentral UNTL nian, Díli (13-14/10).

Reprezentante Dekanu FAGRI nian, Vise-Dekanu Asuntu Kooperasaun no Peskiza, Profesór Graciano Soares Gomes, Ph.D hatete semináriu refere dí’ak tebes, tanba oradór husi Universidade Airlangga partilla koñesimentu no esperiénsia espesífika iha produsaun Animal no Saúde Animal nian ba estudante no dosente sira.

‘’Ohin hanesan pasu primeiru FAGRI hasoru malu ho sira hodi loke semináriu ida ne’e ba estudante no dosente sira, ami espera estudante no dosente sira bele hetan koñesimentu no esperiénsia foun nune’e, ba oin bele hetan atividade barak liután no la’ós iha de’it reprodusaun no saúde animál maibé fó mós ba iha departamentu sira seluk iha FAGRI nian”, dehan Profesór Graciano.

Profesór ne’e mós hatutan atividade ne’ebé realiza bele kesi metin lasu kooperasaun UNTL ho Universidade Airlangga liuliu FAGRI nian hodi fahe siénsia ba estudante sira.

“Agradese ba profesora sira husi Universidade Ailangga ne’ebé hakarak partilla esperiénsia ida ne’e ba estudante sira iha FAGRI nian, hodi ajuda estudante sira preparadu liután antes tun ba terrenu”, agradese.

Semináriu ne’e realiza konta tanba kooperasaun UNTL ho Universidade Airlangga no oradór mak Dra. Erma Safitri, MSi.,drh. no Dra. Eka Pramyrtha Hestiana, drh. M.kes.